Pen Y Cymoedd Yn Pweru Chwilfrydedd Myfyrwyr gyda Gweithdai Tyrbinau Gwynt wedi'u hariannu'n llawn

Mae dros 280 o ddisgyblion Blwyddyn 5 a Blwyddyn 6 o saith ysgol yn ardaloedd Rhondda, Cynon, Castell-nedd ac Afan wedi cymryd rhan yn ein Gweithdai Tyrbinau Gwynt yn ystod cam cyntaf y prosiect sy'n para hyd at hanner tymor mis Chwefror.

Diolch i gyllid gan Gronfa Gymunedol Fferm Wynt Pen y Cymoedd, mae EESW wedi gallu prynu pecynnau Tyrbin Gwynt newydd sydd wedi gwella'r gwaith o gyflawni'r prosiect hwn a'n galluogi i gyflwyno gweithdai i ysgolion o amgylch Ardal Fudd Pen y Cymoedd yn rhad ac am ddim.

Mae myfyrwyr wedi mwynhau dysgu am ynni cynaliadwy drwy gyd-destun nod Llywodraeth Cymru o ddiwallu 100% o'i hanghenion trydan o ffynonellau adnewyddadwy erbyn 2035. Trwy weithdy ymarferol dwyawr, mae myfyrwyr yn dysgu sut mae tyrbinau gwynt yn gweithio ac yn datblygu sgiliau datrys problemau trwy adeiladu a phrofi eu tyrbinau gwynt eu hunain gyda'r nod o gynyddu allbwn foltedd i'r eithaf.

Yn ogystal â datblygu sgiliau cyfathrebu hanfodol wrth iddynt weithio mewn grwpiau, gall myfyrwyr ychwanegu geiriau technegol fel gerau, llafnau, generaduron a moduron at eu geirfa. Ar ben hynny, gyda chymorth adnoddau a ddarperir gan Vattenfall sy'n berchen ar Fferm Wynt Pen y Cymoedd ac yn ei gweithredu, gallwn ysbrydoli myfyrwyr ynghylch swyddi yn y dyfodol drwy dynnu sylw at y gyrfaoedd amrywiol yn yr ardal leol sy'n gysylltiedig â gwynt ar y tir.  

Mae llawer mwy o ysgolion wedi cofrestru eisoes i gymryd rhan yn y misoedd nesaf, ac rydym yn annog unrhyw ysgolion yn Ardal Fudd Pen y Cymoedd i gysylltu â ni i archebu gweithdy.